創立高達研究所本來不過係幾個朋友想有個平台分享下模型心得，利用設計技能將啲平日吹水講笑嘅話題變成網上meme圖搏君一笑，一切都係興趣使然。後黎仲有機會為高達設計一系列服裝，嗰種興奮又緊張嘅心情真係非筆墨足以形容。
到數月前贊助商竟然邀請我地協助參與香港電玩動漫節！果然做大事嘅人膽色同冒險精神都非常人可以理解！
眨下眼今日就係動漫節最終日，回想當初入紙申辦到設計展位、構思整個活動、到物流安排、牌照申請等等等等，全部都係新嘗試。每一個環節都令人汗流浹背，生怕一個小失誤就壞了大事。終於所有困難都一步一腳印咁衝過左！到開幕前夜，可以做嘅應該做嘅都做了，就聽天由命吧！
懷住萬二分不安守候開幕，然後梅菲定律就發揮力量了。首日人流就遠超預期，加上倉庫出現狀況，令不安升級到恐慌⋯⋯幸得各方好友湧入幫忙，解決了大部分問題，令我們得以正常運作，同時上左寶貴一課，經驗值double up!
終於無事到了終日，要感謝嘅朋友實在太多，好多有錢都未必請得郁嘅神級大大無私咁喺佢地嘅渠道幫我地宣傳，連日各方好友現身撐場，不少客人購物後推介朋友黎光顧，除左感恩⋯⋯都只有感恩。
其實幾日動漫節，比起推銷我更用心觀察客人們嘅反應。有三五成群嘅客人拎住啲衫就討論起聯邦軍嘅軍階結構、有些鬥數風褸上的名場面金句對白、有小孩竟然完美說出衣服上機體名字，我看到他爸爸嘴角掛住滿意嘅笑容，有女士獨自進場購物，要俾個驚喜高達迷丈夫⋯⋯一幕幕畫面令我喜上眉梢。能令別人欣賞我嘅作品，引起共鳴並分享喜悅，大概是設計工作唯一令人感到快樂的事情。
今日大概會係漫長嘅一日，希望大家鍾意我嘅作品，亦歡迎大家黎搵我地傾偈，黎緊嘅新設計有你地嘅意見一定會更完美。
多謝大家支持。
晏啲見！